Ja, in de gemeente Nunspeet stoan gelokkig nog een poar heel mooie historise koor’n meulens!
Misschien he’je ’t nog nit goed bekeek’n, mar Molen ‘De Hoop’ uut 1894 in Elspeet is de leste joaren merakels mooi op e’knapt en in e’richt. De nieje eigenaren van de meulen bin bekende Elspeters; ene is zellufs de kleindeerne van de ouwe mulder Smink (1965-2006). Du’r wurd doar veule organiseert in en um de meule: je kun du’r zelluf een knap feestjen houwen of vegaader’n, du’r is joarluks de Boer’ndag Elspeet op de leste zoaterdag van augustus, de Nationale Molendag op de 2e zoaterdag van mei en de Open Monumentendag op de 2e zoaterdag van september.
Oafgeleupen 21 november was du’r zellufs een wild- en vuur spektakel organiseert mit wild vleis op de barbekjoe, een bierpreuverieje en jachthoornbloazers d’r bie. Ieder ene hef geneut’n! Je kun de meulen bekiek’n samen met één van de molenaars, vrogger heet’n dee ‘de mulder’. Oek loop’n du’r van tied tot tied oek nog een poar ‘Molenaars in opleiding’ rond, dee ut nog mut’n leer’n. Ut Nederlandse molenaarsambacht is vanoaf 2017 bie Unesco Immaterieel Cultureel Arfgoed e’wurd’n. Da’s nit niks, dus zee weet’n alles van de meule en wat zee doar moal’n, want zee hem’n nit allenig ut Diploma ‘Vrijwillig Molenaar’ van het Gilde van Molenaars, mar hem oek diploma’s van het AKG (Ambachtelijk Korenmolenaars Gilde).
Dus je kunt ze ut hemde van ut lief vraag’n over de meulen, ut moalen en ut meel. Zee hem doar echt schik in en bin op de meulen op woensdag en zoaterdag van 10-14.00 uur. Dus kom allenig, of mit de vrouwe, de keerl of neem de (klein-) kinders mee: goa du’r gerust mar us hinne. Altied mooi um doar rond te loop’n. Veerder is ut doar een mooi spulletje op de meulen, want in de meulenwinkel ku’je meel veur brood, veur keek en veur pannekoek’n koop’n. Veur eigen gebruuk of as kado um te geev’n. Een poar vriendelijke vriewilligers help’n je greege en hem oek nog een fijn bakjen koffie mit iets lekkers du’r bie, a’j dat wil’n.
En, dat lekkers dat bak’n zee zelluf! Liekt joe dat noen zelluf oek mooi um doar op de meulen misschien molenaar te wurd’n of wat vriewilligerswark te goan doen, goa dan us kiek’n wat joe zol liek’n en proat doar us effen over wat of d’ur meugelijk is. Ut is een gezellug koppeltjen volk wat doar samen an de gang is. Wie kiek’n noar joe uut en zien je greege kom’n!
Muldersgroet’n van Korenmeul’n De Hoop
Ps. Mocht je bovenstaande nou echt niet kunnen lezen, vraag dan de vertaling op bij redactie@elspeet.nu
